Shuster: Të mbyllim llogaritë

Trajneri i Realit të Madridit, Bernd Shuster, është shprehur i kënaqur me gjendjen e skuadrës së tij dhe gjithashtu është shprehur optimist për marrjen e një rezultati pozitiv përballë Mursias në “Santiago Bernabeu”. “Nuk do të jetë një ndeshje e lehtë, megjithatë duhet ta fitojmë për të mbyllur llogaritë dhe për të qenë edhe më afër titullit kampion. Kemi shumë nevojë për tri pikët, të cilat do të na lejojnë që të jemi më komod në krye të klasifikimit. Mursia është një skuadër që lufton për të mbijetuar, kështu që ata do të vijnë shumë të motivuar në Madrid. Nuk do ta kemi të lehtë kështu që duhet të tregohemi shumë të kujdesshë”, tha Shuster, i cili gjithashtu foli edhe për akuzat e trajnerit të Mursias, Havier Klementes, i cili në një intervistë të dhënë deklaroi se të drejtosh një skuadër të mëdhe si Reali është shumë e lehtë. “Eshtë mendimi i tij. Me Klementen kam marrëdhënie shumë të mira. E respektoj shumë si trajner dhe meriton të gjitha elozhet e botës. Nuk jam i duhuri për Realin? Ndoshta ka të drejtë, është e mundur. Nuk e di nëse ai ka eksperiencë, megjithatë skuadrat e mëdha janë si kombëtaret. Ndonjëherë mund të jetë e lehtë, por në disa raste puna e një trajneri mund të vështirësohet shumë gjatë rrugës. Por, Havier duhet të dijë se ne trajnerët jemi vetëm pre e shtypit dhe e gazetarëve”.

Klemente: Eshtë e lehtë të drejtosh Realin!

Trajneri i Mursias, Havier Klemente, në konferencën për shtyp të dhënë përpara ndeshjes me Realin e Madridit, ka hedhur një “lumë” akuzash në adresë të teknikut Bernd Shuster. “Eshtë shumë më e lehtë të drejtosh një skuadër të madhe si Reali i Madridit se sa një skuadër si Mursia, e cila ka shumë probleme dhe ka për synim të mbijetojë në Primera Division”, tha Klemente, i cili beson te marrja e një rezultati pozitiv në “Bernabeu”. “Asnjë skuadër nuk është e pamposhtur dhe nëse japim maksimumin tonë në fushën e lojës, atëherë mund t’i marrim të paktën një pikë në Madrid. Do të jetë një ndeshje shumë e vështirë për ne dhe shpresojmë të bëjmë më të mirën tonë”.