Rajkard: Titulli, i pamundur!

Trajneri i Barcelonës, Frenk Rajkard, është shprehur shumë i zhgënjyer pas barazimit 2-2 të arritur përballë Rekreativos, në një ndeshje ku skuadra katalanase ka lënë dy pikë shumë të vlefshme. "E filluam shumë mirë ndeshjen, por nuk arritëm të kontrollonim avantazhin e krijuar. Jam i kënaqur me punën e skuadrës, por jo me golat e pësuar. Kishim mundësi të merrnim një fitore shumë të vlefshme, por humbëm dy pikë shumë të rëndësishme. E dominuam ndeshjen, ndërsa Rekreativos arriti të na ndëshkonte nga gabimet tona. Goli i parë? Nuk e kam parë epidosin, por Valdez më tha se topi nuk e kishte kaluar vijën fatale. Nuk dua të fajsoj gjyqtarin. Ai e ka gjykuar si gol dhe ne nuk mund të bëjmë asgjë tani. Duhet të analizojmë gabimet tona, sidomos te goli i dytë i Rekreativos", tha Rajkard, i cili mendon se me këtë barazim, titulli kampion është pothuajse i pamundur. "Kemi humbur dy pikë shumë të vlefshme dhe më vjen keq për këtë. Matematikisht gjithçka është e mundur, por mendoj se është shumë e vështirë. Kanë mbetur edhe gjashtë ndeshje, por do të jetë shumë e vështirë. Skuadra do të luftojë, edhe pse shanset nuk janë më aq të mëdha sa më parë". Lajmi i mirë për Barcelonën ishte rikthimit i Lionel Mesit në fushën e lojës pas më shumë se një muaji. "Jam i lumtur për të sepse është një lojtar shumë i rëndësishëm për skuadrën. Shpresoj që të jetë në 100% të formës së tij në takimet me Mançester Junaitedin".