Junaited "vret" Arsenalin!

Mançester Junaitedi nxori përfundimisht nga gara për titull Arsenalin duke e mundur 2-1 dje në "Old Trafford". "Topçinjtë" e nisën në mënyrën më të mirë takimin, pasi shënuan të parët me anë të Emanuel Adebajor, por goli i 38-të sezonal i Kristiano Ronaldos (me penallti) dhe një goditje dënimi e ekzekutuar në mënyrë të përkryer nga Ouen Hargrivs i dhanë fund shpresave të tyre. Skuadra e Vengerit luajti disi më mirë, por shpërdoroi shumë edhe në fund, kur kishte mundësi të merrte qoftë edhe një pikë. Kur Adebajori shënoi me kokë (disa pamje treguan se e shtyu edhe me dorë topin) u duk sikur miqtë nga Londra do të mbanin gjallë shpresat e tyre. Por ishte kapiteni Gallas që me një prekje të topit me dorë në zonë, shkaktoi 11-metërshin e realizuar nga Ronaldo pas dy përpjekjesh. Dhe "perla" e Hargrivsit bëri që Junaitedi të kalonte tani gjashtë pikë para Çelsit në renditje, edhe pse blutë do të presin sonte Uiganin në "Stamford Bridge".

Venger: Tani gjithçka mori fund

Trajneri Arsenalit, Arsen Venger, pranoi se shpresat e skuadrës së tij për të fituar titullin janë shuar totalisht pas humbjes ndaj Mançester Junaitedit. "Po, tani jemi jashtë gare", tha Vengeri. "Luajtëm me cilësi dhe me shpirt dhe jam krenar për paraqitjen tonë. Nuk kemi çfarë të bëjmë tani. Patëm shumë raste për të shënuar dhe ishim vërtet të pafat që nuk arritëm të fitonim këtë ndeshje". Vengeri nuk gjeti fjalët për të shpjeguar këtë kthesë negative që ka marrë sezoni i skuadrës së tij, që në fillim të shkurtit ishte pesë pikë para vendit të dytë dhe tani ka zbritur edhe në vend të tretë. Një arsye për Vengerin është edhe fati i keq. "Dy muajt e fundit nuk kemi qenë me fat dhe kjo u pa edhe në këtë ndeshje të fundit", tha ai. "Eshtë e vështirë që të gjejmë një arsye të vërtetë kur sheh se si humbëm, pas lojës që zhvilluam". Arsenali është kritkuar shumë për mungesën e konkretizimit të lojës në gola dhe përvojës së pakët në, por Vengeri ka besim tek lojtarët e tij dhe është i bindur që mund të fitojnë një titull. Sigurisht jo këtë vit. "Besoj se kjo skuadër është mjaftueshëm e mirë sa për të fituar", shtoi ai. "Patëm një rënie në formë që prej marsit dhe duhet të gjejmë arsyet pse na ndodhi kjo, por objektivi kryesor tani është që skuadra të mos ndryshojë dhe të vazhdojmë projektin me këta lojtarë".