Operohet Toti: Do të rikthehem më i fortë

“Ndihem i qetë, edhe pse pas dëmtimit, kur dëgjova gjurin të bënte një zhurmë të çuditshme, isha i shqetësuar. Po mendoj që tani për të ardhmen dhe dëshira ime është të rikthehem më i fortë se më parë, me punë dhe stërvitje”. Kanë qenë këto fjalët e Françesko Totit, i cili ka folur nga dhoma e spitalit ku është shtruar, menjëherë pas operacionit të kryer nga doktor Mariani, i njëjti që kreu ndërhyrjen kirurgjikale kur kapiteni i Romës u dëmtua para dy vitesh, në ndeshjen ndaj Empolit. Mariani ka konfirmuar më pas kohët e riaftësimit: “Do t’i duhet një muaj terapi intensive dhe më pas do t’i mbetet stafit të fizioterapistëve që ta ndihmojnë të kthehet. Mendoj se pas katër muajsh do të jetë në fushën e blertë. Operacioni shkoi mirë dhe nuk do të ketë probleme”. Toti ka bërë edhe një batutë: “Që në ndeshjen me Udinezen vura re se gjuri nuk po më përgjigjej mirë, por nuk dyshova se mund të kisha probleme”.