AUSTRALIA PA JODIE HENRY-n NË LOJËRAT OLIMPIKE "PEKINI 2008"

e mart 11.o3.2008
Australia do të jetë e hendikepuar në Lojërat Olimpike Verore "Pekini 2008" pa notaren më të mirë në këtë shtet, Jodie Henry, e cila ka paralajmëruar se nuk do të udhëtojë drejt Kinës, për shkak të lëndimit të një muskuli në pjesën e legenit të trupit, që në mjekësi njihet me emrin pelvic. Këto fjalë tri herë fituesja e medaljes së artë nga Lojërat Olimpike i tha në një konferencë për media të mbajtur në Sydney. "Jam këtu për t'ju njoftuar se nuk do të notoj në olimpiadën e radhës, dhe për këtë e kam njoftuar edhe komitetin olimpik të Australisë, tha Henry. Henry e cila para katër vjetësh në olimpiadën e Athinës triumfoi në 100 metra stil të lirë, dhe i priu shtetit të saj për të fituar medalje të arta në disiplinën 4x100 metra stil të lirë dhe 4x100 metra stil të përzier, do të jetë mungesa më e madhe për këtë shtet, ka thënë trajneri Alan Thompson. Australia në lojërat e Pekinit do të paraqitet me 480 atlet të cilët dje erdhën në Sydney për ta marrë uniformën shtetërore me të cilën do të defilojnë nëpër këto lojëra.