DE LA HOYA – STEVE FORBES, BOKSOJNË MË 3 MAJ NË LOS ANGLELES

e mart 11.03.2008.
Fituesi i medaljes së artë dhe i gjashtë divizioneve në kampionatin botëror në boks, Oscar De La Hoya, e ka bërë zyrtare datën e meçit të radhës, të cilin do ta zhvillojë kundër bashkë-kombasit të tij dhe ish-kampionit të botës Steve Forbes. 3 maji do të jetë data që do t'u mundësojë këtyre dy boksierëve të famshëm t'i kryqëzojnë dorëzat në meçin i cili do të zhvillohet në Los Angeles. Djaloshi i artë siç njihet ndryshe De La Hoya në konferencën për media të mbajtur në New York, ka shtuar se ky do të jetë vetëm njëri nga tri meçet që ai i ka planifikuar t'i boksojë gjatë vitit 2008. "Njerëzit po thonë, oh tashmë ky djalosh ka filluar t'i ndreqë luftërat, po unë nuk mendoj ashtu, dhe nuk merrem me ato punë, ka thënë De La Hoya, i cili përgjatë karrierës së tij i ka shënuar 38 fitore prej të cilave 30 me nok-aut dhe i ka pësuar 5 humbje. Ky do të jetë një meç i vërtetë, dhe meçe të tilla kam plan t'i realizoj tri brenda këtij viti. Një nga këto meçe do të jetë edhe ky kundër Steve Forbesit. Ai është një kundërshtar shumë i fortë dhe shpresoj që të jem i gatshëm deri atë kohë për t'u përballur me të, dhe do ta konsideroj këtë meç ngjashëm sikurse të jetë lufta e fundit apo edhe e para në jetën time, ka thënë De La Hoya, që është kritikuar nga mediat amerikane, kinse po i zgjedh kundërshtarët më të dobët për të shënuar më shumë suksese personale, edhe pse statistikat tregojnë që Forbes është një boksier me përvoja, pasi deri më tani i ka shënuar 33 fitore dhe i ka pësuar 5 humbje. Për këtë rast Forbes, ka shtuar se ky do të jetë një meç i dy gjentelmenëve. Do të jetë meç i dy mjeshtërve të boksit dhe dy artistëve të cilët në çdo kohë kanë qenë të gatshëm të fitojnë diçka në karrierë tituj botërorë etj. De La Hoya, i cili ka shprehur entuziazmin e vet që do të boksojë në Los Angeles, ka thënë se primare për të në vitin 2008 para se t'i thotë lamtumirë karrierës profesioniste do të jetë meç i shtatorit kur ai do të boksojë revanshin me Floyd Mayweather, i cili në majin e vitit të shkuar e kishte mposhtur.