Mario Gomez, "fenomeni" me valixhet gati!

Sulmuesi i Shtutgartit, Mario Gomez, po kalon një formë aq të mirë sa drejtuesit e klubit gjerman janë të vetëdijshëm se do ta kenë të vështirë që ta mbajnë në skuadër deri në fund të kontratës katërvjeçare. Gomez, i cili u shpall futbollisti më i mirë i Bundesligës në sezonin e kaluar, shënoi tri gola në fitoren 6-3 që Shtutgarti arriti ndaj Verder Bremenit. Gomez ka arritur Luka Tonin në krye të renditjes së golashënuesve me 14 gola. "Eshtë e pamundur që Mario të qëndrojë me ne deri në vitin 2012, - tha drejtori teknik i kampionëve të Gjermanisë, Horst Heldt. - Nuk jemi aq naivë sa të mendojmë se Gomez do të qëndrojë në Shutgart deri në fund të karrierës. Gjithsesi, ne do të bëjmë të pamundurën për ta mbajtur sa më gjatë." Sipas gazetës gjermane "Kicker", skuadrat italiane, Juventues, Milan dhe Fiorentina janë interesuar për shërbimet e 22-vjeçarit, i cili me siguri do të jetë pjesë e kombëtares gjermane që do të luajë në Euro 2008. Ndërkohë, sot Shtutgarti do të luajë ndeshjen e prapambetur të Bundesligës, ndaj Kotbusit të vendit të fundit. Mario Gomez tha: "Rezultatet e fundit na e kanë shtuar besimin për aftësitë tona. Në Kotbus do të jetë një ndeshje shumë e vështirë, të cilën duhet ta fitojmë me çdo kusht". Nga ana tjetër, kapiteni i Kotbusit, Timo Rost, ka kërkuar nga shokët e tij të luftojnë më shumë dhe të besojnë te qëndrimi ndërmjet më të mirëve. Humbja e së shtunës, 3-0 ndaj Volfsburgut, e lë Kotbusin në vendin e fundit të klasifikimit, por ata janë vetëm dy pikë larg shpëtimit, kur mbeten edhe 11 ndeshje për t'u luajtur. Rost tha: "Duhet të rikthehemi e të luajmë futbollin e disa javëve më parë, kur ishim të suksesshëm. Kjo do të thotë se duhet të jemi më agresivë dhe të ashpër në ndërhyrje. Nuk duhet të dorëzohemi, sepse i kemi të gjitha mundësitë për të mbijetuar." Si Kotbusi ashtu edhe Shtutgarti nuk kanë asnjë futbollist të padisponueshëm për ndeshjen e sotme.