Rajkard: Edhe një sforco dhe do të jemi në Moskë

Barcelona ka arritur një kualifikim shumë të rëndësishëm dhe Frenk Rajkard e di shumë mirë këtë. Pas barazimit me Getafen në kampionat, skuadra katalanase kishte nevojë për një sukses të tillë përballë Shalkes. “Ndihem shumë i lumtur sepse skuadra ka arritur në gjysmëfinalet e Champions League. Ishte një fitore shumë e rëndësishme për ne dhe shpresojmë të vazhdojmë kështu. Shalke e filloi mirë takimin sepse nuk kishte çfarë të humbiste. Më pas, skuadra e përmirësoi lojën dhe goli i Turesë na qetësoi shumë. Eshtë e vërtetë që nuk kemi zhvilluar një ndeshje shumë të mirë, megjithatë rezultati i takimit të parë na detyroi të ishim të kujdesshëm dhe pak të shfrenuar në iniciativat sulmuese. Pjesa e dytë ishte më e mirë për ne dhe mund të kishim shënuar edhe gola të tjerë”, tha Rajkard, i cili tashmë ka filluar të mendoj për kundërshtarin e radhës, Mançester Junaitedin. “Duhet të përgatitemi për dy ndeshje të mëdha. Mançesteri është një skuadër që po kalon një formë shumë të mirë dhe jam i kënaqur që do të luajmë përballë tyre. Në këtë dy takime mund të ndodhë gjithçka, por unë nuk mund të flas për favoritët. Ne jemi shumë afër finales së Moskës, por për të qenë atje na duhet edhe një sforco tjetër. Jam i bindur se ne i kemi të gjithë mundësitë për të marrë atë që dëshirojmë, por duhet të dimë se nukmdo të jetë aspak e lehtë. E rëndësishme është të bëjmë më të mirën tonë”. Në fund, Rajkard foli për vërshëllimat e tifozëve katalanas që ndodheshin në “Camp Nou”, pasi tekniku holandez zëvendësoi Bojan Krkiçin me Dos Santosin. “Vërshëllimat ishin për mua, por më bëhet qejfi sepse Bojan ka zhvilluar një ndeshje të madhe dhe ka arritur të fitojë simpatinë e tifozëve. Por gjithashtu ndihem edhe i trishtuar sepse tifozët duhet të kuptojnë se në fushën e lojës hyri një djalosh 18�vjeçar si Dos Santos, i cili ka nevojë për mbështetje”.