KLITSCHKO KAMPION ABSOLUT, FITON KUNDËR IBRAGIMOVIT

Boksieri ukrainas, Vladimir Klitschko, e ka mposhtur me pikë rusin Sultan Ibragimov, pas meçit që zgjati 12 runda të zhvilluar të shtunën pas mesnatës në Madison Square Garden të New Yorkut. Klitschko falë përgatitjes më të mirë fizike, shtatë kilogramëve më shumë, dhe shtatë lartësisë më të madhe ishte superior ndaj rivalit të tij Ibragimovit, të cilin e mposhti unanimisht me rezultat: 119-110, 118-110 dhe 117-111. Kështu pas nëntë vjetësh janë unifikuar brezat dhe Klitschko tash është kampion absolut në pesha të rënda, pasi ukrainasi deri më tash ishte kampion i kategorive IBF dhe IBO, ndërsa kundërshtari i tij Ibragimov, mbrojtës i titullit WBO, brez ky që tashmë i takon 31 vjeçarit Klitschkos. Lennox Lewis ishte i fundit që pati këtë nder, pra të stoliset me titullin e kampionit absolut, në nëntor të vitit 1999, kur atë kohë e kishte mposhtur legjendën, ende aktiv në boks, Evander Holyfield. Klitschko pas këtij triumfi ka 50 fitore prej të cilave 44 me nokaut dhe tri humbje, derisa për Ibragimov kjo ishte disfata e parë në boksin profesionist karshi një barazimi dhe 22 fitoreve prej të cilave 17 me nokaut. "Në tri javët e fundit kam pasur probleme me dorën e djathtë, dhe nuk kam mundur të punoj shumë në ring me atë dorë. Sa i përket vetë meçit mendoj se ishte më i fortë se ç' kam pritur, ka thënë Ibragimov në konferencën për media pas meçit. "Nga ana tjetër Klitschko shtoi: Nuk ishte e lehtë të fitosh në një meç të tillë, ishte gjithçka impresionuese, mendoj se e fitova këtë duel duke shfaqur një luftë të vërtetë.
Dy brezat e tjerë aktualisht mbrohen nga rusi Oleg Maskaev (WBC) dhe uzbeku Ruslan Chagaev (WBA), i cili supozohet se ka mundësi të boksojë kundër shqiptarit Luan Krasniqi.