Bajerni, me sprint drejt titullit

Në takimin më të rëndësishëm të javës, ai mes Bajernit të Mynihut dhe Bajer Leverkusen, Luka Toni shënoi dy gola që garantojnë qetësi te bavarezët për javët në vazhdim. Përballë Bajernit, miqtë nga Leverkusen treguan dobësi në fillim të takimit. Heroi i ditës, italiani Luka Toni e shfrytëzoi situatën duke shënuar golin e parë në minutën e 17�të. Në pjesën e parë të lojës, porta bavareze u rrezikua vetëm një herë seriozisht. Me tre pikët e fituara, Bajerni e përforcoi pozitën e saj në krye të tabelës dhe është në rrugën e duhur për të fituar titullin. Një fitore tjetër e rëndësishme e ditës së djeshme ishte ajo e Shtutgartit në shtëpi kundër

Hansa Rostokut. Kampionët në fuqi shënuan katër gola, të cilët u realizuan nga katër lojtarë të ndryshëm. Hamburgu u mjaftua me barazimin 1�1 në Volfsburg duke i lënë mundësi Bajernit të shkëputet edhe më. Po kështu, me rezultat të barabratë u mbyllën edhe dy takimet e tjera të ditës së djeshme, ai mes Nyrenbergut ndaj Bohumit dhe Borusias së Dortmundit me Karlsruhen.



Toni: Do të qetësohem vetëm kur

të jemi matematikisht kampionë!

Për Bajernin e Mynihut gjithçka shkoi sipas planit në duelin e rëndësishëm kundër Bajer Leverkusenit. Trajneri Otmar Hitcfeld dhe drejtuesët e tjerë të klubit janë shumë të kënaqur me fitoren falë dy golave të Luka Tonit. “Skuadra u paraqit shkëlqyeshëm. E kontrolluam që në fillim kundërshtarin dhe u orientuam si duhej në sulm. Në pjesën e parë pati raste për të dyja skuadrat. Momenti vendimtar erdhi në pjesën e dytë, kur Toni shënoi golin e dytë. Pas këtij goli, patëm edhe tre apo katër mundësi të tjera për të shënuar golin e tretë. Por, pas golit të Leverkusen, na zunë ethet për dhjetë minuta. Në fund të fundit, kështu është futbolli”, tha Hitcfeld. Ndërsa protagonisti i takimit, Luka Toni u shpreh: “Jemi të kënaqur që fituam. Më vjen mirë që shënova dy gola. Ishte me të vërtetë një fitore e rëndësishme. Jemi në një fazë ku çdo pikë ka shumë vlerë për përfundimin e kampionatit. Megjithatë, nuk mund të jemi të qetë. Vetëm kur ta kemi siguruar titullin matematikisht, atëhere do të jem i qetë”.